Ua molia nei e leoleo le afioga ia Tiumalumatua Maifea Fetu Lasei, o se tamā faasalalau i luga o leitio mai Ausetalia i le moliaga o lona lalafo lea o ni faamatalaga taufaaleaga ua aafia ai le tulaga ta’uleleia o se tagata, e tusa ai ma le tulafono 117A.
Na faamaonia mai e le Afioga I le alii Komesina o le Matagaluega o Leoleo, Auapaau Logoitino Filipo ina ua fesiligia e le Radio Samoa e faapea, o le afiafi ananafi, Aso Toonai 9 Iulai 2022 na molia mai ai e leoleo le susuga Tiumalu. Sa toe tatala i tua lea tamā e faatali ai lona tulai i le Faamasinoga e tali i lona moliaga i le Aso Lua, 2 Aokuso 2022.
Ua taofia foi e leoleo le tusifolau o lē ua molia ma o tuutuuga o le tatala ai i tua, e tatau ona saini atu i le ofisa o leoleo i Faleolo i Aso Faraile o vaiaso taitasi. O lē ua molia na malaga mai Ausetalia ma lona faletua mo le fonotaga a lana Ekalesia Metotisi, peitai o lea ua molia ai nei ona o ni faamatalaga na ia lalafo e faasaga i ta’ita’i o le malo faapea ai nisi o minisita o le Kapeneta i ni ana polokalame sa faia i luga o se alaata mai Ausetalia.
Na maua i lipoti e faapea, o se tagi sa faila atu e le failautusi o le vaega faaupufai o le FAST le Tofā Vaaaoao Salu Alofipo, faasaga i lē ua molia e uiga i ana lafoga, lea ua faatino ai loa le galuega a Malu o le Malo.
