O le aso 24 o le masina fou o Fepuari o le a tula’i ai i le Faamasinoga Faaitumalo mo le valaauga muamua o ona moliaga le susuga Tuilaepa Lupesoliai Sailele Malielegaoi o le faipule sinia o le Palemene ma le ta’ita’i o le vaega faaupufai e puipuia aiā tatau a tagata o loo agaia le malo.
I se fesoota’iga i le Sui Komesina o le Matāgaluega o Leoleo, Falepuipui ma le Toefuata’ina na faailoa mai ai e le susuga Leiataualesa Samuelu Afamasaga, e lua moliaga o loo tuua’ia ai Tuilaepa, moliaga ia o le faia o tala taufaaleaga ma le faia o gaioiga faasoesa e faaaogā ai auala o fesoota’iga faatekonolosi.
Faaalia foi e le Sui Komesina na usita’ia lava e le ta’ita’i o le Itu Agai le galuega a leoleo e pei ona sa oo atu i le ofisa autū o leoleo i Apia ma feiloa’i ai ma malu o le malo o loo feagai ma le tagi a le Minisita o A’oga ma Aganuu, ma fautuaina ai Tuilaepa i ona aiā tatau ma moliaga ua molia ai.
Ua tatala le ta’ita’i o le Itu Agai i aiaiga o le taofia o lona tusifolau.
