O si alii Samoa o Tupuga Sipiliano na maliu fasia faafuasei i le Aso Tofi o le vaiaso talu ai i le faalavelave na tafana ai e se tasi alii talavou sa latou faigaluega faatasi, o Matu Reid, lea na maliu ai foi ma ia, ina ua ia toe fanaina o ia lava.
I se faatalanoaga a le leitio o le Talofa FM i Samoa ma le tina ia Mena Sipiliano, o le tuaa lea o Tupuga Sipiliano, na talanoa ai le tina ma ia toe manatua si ona alo, fai mai a ia, o lona atalii matua lea, ma ua tusa nei ma le 23 tausaga talu lona aumau Tupuga i Niu Sila.
O Tupuga o se alii e galue i galuega faakamuta, ma o se alii e loto alofa, ma o le tele o taimi poo fea lava nofoaga e galue ai si ana tama i ni a latou faugafale, e tele lava ina tapue ai ona ata ma lafo atu ia te ia.
Ua matuā misia e le tina ia Mena si ona alo, ma o le manaoga sa iai o le tina ina ia toe faafoi atu le tino maliu o si ana tama e lagomau i Samoa i autafa o le tuugamau o si ona tamā, peitai na fautuaina e le pulega i Niu Sila nei le tina, e le faigofie lea tulaga ae sili ai ona malaga mai ia i Niu Sila, ma o le fuafuaga lena ua iai.
Taitaifono o le Ōtata-Papatoetoe Local Board, Apulu Autagavaia. Photo by RNZ
Na ta’ua foi se manatu o le susuga i le taitaifono o le Local Board a Otara-Papatoetoe, le susuga Apulu Autagavaia, i le toatele o tagata o le komiuniti o loo momoli atu faamaisega ma moomooga alofa i le aiga o nai alii ua maliliu.
Saunoa Apulu, e toatele ua lagona le faanoanoa i le faalavelave na tulai mai, ma e toatele foi faalapotopotoga ma ekalesia eseese i le komiuniti o loo fia galulue soosootau’au ma fesoasoani i o la aiga.
O le itu e faanoanoa ai, ona o i laua uma ua maliliu o ni alii Samoa, ae o le alii foi na faatinoina le faalavelave e iai foi lona pito Samoa, ae pagā lea ua augapiu lava ma se faatinoga o tu ma aganuu i le va lea e foia ai se faafitauli atonu na tulai.
O le tulai mai o lenei faalavelave matautia, ua toe tilotilo ai foi i latou o loo avea ma taitai i totonu o le komiuniti ia ia iloa le mafuaaga ma saili se fofo, ina ia le toe tulai mai lenei faalavelave matautia i se isi taimi.
