O le a misia e le prop a Manly o Toafofoa Sipley le malaga a lana ‘au i Las Vegas ina ua ia ioeina le mataupu e faatatau i lana pue malosi i le alii taalo o Dom Young.

E tolu taaloga ua faasala ai Sipley, o lana pue lea na ave ai i le falemai le alii o Young i le Aso Toonai ma ua misi ai ma lona auai i le malaga a lana ‘au i Amerika i le faalauiloaina atili o le taaloga i lea foi atunuu.

Sa iai le faamoemoe o lana ‘au o le a tulaga lelei le la paga ma Taniela Paseka lea foi na tulaga lelei ana taumafaiga i le taamilosaga o le tausaga talu ai.

O le faasalaga la o Sipley e pei ona faailoa e le 7News ua ono matala ai le avanoa mo Nathan Brown.

E lē o mautinoa lava pe taaalo Josh Schuster i le uluai taaloga i Vegas i le aso 2 o le masina fou o Mati.

O isi faasalaga ua faailoa i le lipoti e aofia ai le 5 o taaloga e faasala ai le alii taalo o le Warriors o Zyon Maiuu ona o lana pue ia Declan Casey ma le second rower a le Tigers o Samuel Fainu e ono faasala i lana pue maualuga ia Jacob Laban o le Warriors.