E ui ina sa loulouā le tau i le toulu o timuga ae e lei taofia ai le agaga talimalo o Samoa i tulisi poo tagata tafafao sa malaga mai i le meli muamua ua afea lo tatou atunuu i le masina amata o lenei tausaga fou.
O le Aso Lua na afea ai le taulaga o Apia e le meli o le MS Nautica ma lana pasese e 969 ua aofia ai ma le auvaa e 341.
E fulisia tulisi na malaga tafafao mai ai ia i latou mai Amerika.
O le iai i le atunuu o lea meli na faaalu ai e le auvaa seleni e faatau ai nisi o taumafa e moomia mo le isi ana malaga agai atu i le motu o Borabora i le atunuu o Tahiti.
Na faaalu foi tupe a le pasese i auaunaga eseese e pei o le maketi i le vaega o oloa taulima, lavalava, taavale laiti la’upasese ma pasi faapea ma taumafa.
E 26 isi meli la’upasese o loo faatulaga e afea lo tatou atunuu i le nei tausaga ae mo le masina lava lenei o Ianuari o le faaiuga o le vaiaso nei e lua meli o le a afea Samoa i le Aso Toonai ma le Aso Sa.
O le masina fou o Fepuari ua fuafua e fitu meli la’upasese o le a afea le uafu tele i Apia.
O le autalavou a le Ekalesia EFKS i Faatoialemanu sa latou saunia faafiafiaga faasamoa e faafeiloai ai tulisi sa malaga mai i le meli la’upasese sa afea lo tatou atunuu i le Aso Lua o lenei vaiaso.
