E lē o faigofie i le toatele o tagata totogi mokesi le alu i luga o le tau e totogi mo tului pe a lē faia peimeni, lea ua tuu i luga i le 1.3%.
O se maualuga tele lea talu mai Mati o le 2020, ma e tusa ma le 19,500 nonogatupe ua pasi aso sa tatau ona totogi ai, peitai e lei totogia lava.
O le tala a le 1News o le toatele ua faaalia ai le popole, ma o tagata foi o lea sa faatau o latou fale motu i le taimi o le Koviti o lea ua toe tau fetuunai nonogatupe ona o le maualuluga o tului.
E iai nisi o tagata mai atunuu mamao ua faaalia e sili ai le toe foi i atunuu na omai ai ona ua taugata tele mokesi faapea le tele o pili totogi.
Ae mai se tasi o tagata faufautua ua faamauina e tusa ma le 11.5% tagata o loo nofo aitalafu i peimeni o mokesi ma o tului foi o loo totogi i le taimi nei ua fai lava si maualuluga pe a faatusatusa i isi tausaga ua alu.
A o fesoasoani ai le maualuluga o tului i le tau taofiofia o le inflation, e lē o faigofie i le toatele o tagata Niu Sila.
O le vaiaso fou lea o loo faatali ai foi le faletupe tutotonu poo le Reserve Bank e faailoa mai ai le isi ana faaiuga i le tau o tului totogi.
