O le talimalo ai o Samoa i le taamilosaga sa’ili siamupini a atunuu o le Oceania i le taaloga o le pii lea na tatala i le faai’uga o le vaiaso ua mavae, ua molimauina ai i faai’uga o taaloga o le aso muamua ma le lua le maualuga o le taumafai o le aupii a Samoa.
O le aso muamua e 15 pine na manumalo ai, ma le aso lona lua e 11 pine e aofia ai le aulo, siliva ma le apa memea.
O le aso mulimuli o lea taamilosaga na faatino ai le taaloga i luga o le matafaga i Maninoa i Siumu ma e 13 atunuu o loo tausiniō ai.
E tusa ma le 200 tagata taaalo pii o loo auai ma o le ta’ita’i o le malo i le Palemia na tatalaina aloa’ia lea taamilosaga i le Aso Faraile ua mavae ma faagasolo ai loa i le faai’uga o le vaiaso.
