Talu ai nei i se tausinioga o le taaloga siisii u’amea mamafa sa faia i Ausetalia sa lipotia ai le maualuga o le taumafai a le au siisii a le atunuu i pine sa manumalo ai ma nisi o matati’a sa latou ausia.
Ua faaleo ai le faafetai a le afioga i le Minisita o Taaloga ma Alagaoa mo le fiafia o tagata, le tofa Seuamuli Fasi Toma i le Peresitene ma sui o le faalapotopotoga o taaloga siisii u’amea mamafa a Samoa ona o lea tulaga maualuga na ausia, aemaise o isi tausinioga faavaomalo sa maualuga ai foi le taumafai o au masii o lea taaloga.
O le finagalo o le minisita na saunoa iai ina ua afea lona ofisa e le peresitene ma sui o le taaloga siisii u’amea mamafa e momoli le latou faafetai il e malo, ona o le lagolago o loo tuuina atu pea i le atinaa’e o le taaloga i Samoa.
O le tausaga fou e talimalo ai Samoa i le taamilosaga siisii uamea mamafa a le lalolagi, o se faamoemoe e tele atunuu o le a tausinio ai.
O le feiloaiga foi lea na momoli ai moomooga lelei ma faamanuiaga a le Minisita i tapenaga a Samoa i le tusinioga o le siisii u’amea mamafa mo le ipu o le lalolagi e faia i le tausaga nei.
