I le savalia ai nei o le 49 tausaga o le faiga paaga a le Malo o Saina ma Samoa talu mai le tausaga e 1975 na muai osia ai lea faigauo, e oo mai i le taimi nei e lē o suia pe aveesea ae tumau lava le faaaloalogia ma le amanaia e Samoa o le tasi o le Malo o tagata Saina poo le One China Policy.

Na faailoa le mausali pea o sootaga o Malo e lua i le saunoaga a le afioga i le Sui o le Fono a Sui Tofia le afioga Le Mamea Ropati Mualia, i le sauniga na ia taliaina ai tusi tofiga o le sui filifilia fou o lea Malo mo Samoa le afioga i le alii Amepasa o Saina mo lo tatou atunuu o Mei Fingxing.

Ua suitulaga o ia i le alii Amepasa ua mae’a lona galue i Samoa o Chao Xiaoliang.

O nisi o malo laiti o le Pasefika sa latou faipaaga ma Taiwan o se vaega o Saina ua momotu o latou sootaga ae faipaaga ma Saina, e pei o le Malo o Solomona, peitai o Samoa e lē o suia lava lona sootaga ma lea Malo talu mai le tausaga e 1975 na osifeagaiga ai ma lea Malo tele.

Sa galue le amepasa fou o Saina mo Samoa i se tofiga sinia i le matagaluega o le va i fafo o lona Malo, ma sa galue foi i ofisa o lona Malo i totonu o Ausetalia, Peretania, le atunuu o Durban ma le Malo o Fiti.

Sa galue o ia i le ofisa o le va i fafo o Saina ina ua mae’a ia auaunaga mo lona Malo, seia oo ina filifilia e avea ma amepasa o Saina mo Samoa.

Mo le silafia e le atunuu, ua mae’a fausia le nofoaga fou o le sui o lea Malo i Avele e faafesagai ma le maota o loo faamautu ai le sui o le Malo tele o Amerika.

O le tasi lea o mafuaaga o le lē talia e Amerika Samoa o le fanua na ofoina atu e le Malo o Samoa e fausia ai lona ofisa i Apia ona o le tu lata i le nofoaga fou o le amepasa o le Malo o Saina.

O se isi fanua o le Malo o Samoa i Taumeasina ua fausia ai le ofisa o le faigamalo a Tutuila ma Manu’a.

Ua faailoa i se pepa o faamatalaga faalauaitele mai le ofisa o le va i fafo o le amepasa fou o Saina ua faaipoipo e toatasi lo la alo ma lona faletua.