Ua iai se video ua agiga ai se lipoti i le asō mai le One News e faapea o loo faaali mai ai le sasaina e se tasi tama aoga o Wesley College, o se isi tamaititi aoga e faaaoga ai se laau ma ua faaalu foi lea video i luga o le social media.
Fai mai le One News o video sa o latou vaai iai o loo faailo ane ai tamaiti aoga sinia o le kolisi lea o loo sasa isi tamaiti i le va o le 2021 ma Mati o le tausaga nei lava.
Fai mai le lipoti ua faamatala e nisi o tamaiti aoga sa aafia uma ai i le faiga lea e faapea o le ituaiga sasa lea e faaigoa o le Punou ma e masani lava ona faatino e tamaiti aoga sinia i tamaiti aoga laiti.
O nisi o faamatalaga i lea lava lipoti ua faailoa ai e se tasi o tamaititi na faaoo iai lea sasa a itiiti mai pe toa 14 isi tamaiti aoga sa iai i totonu o le potu i le taimi na sasa ai o ia ma ua faailoa i luga o le upega tafailagi a le televise ata o manuaga o lea tamaititi ma lana faamatalaga na te lei ta’uina lava i se isi.
Fai mai le tamaititi e fiafia i le aoga peitai o sauaga ia ua matuai leai lava iai.
Ta’ua foi i le lipoti ua tuuina atu e le One News ni tuuaiga i le aoga e aofia ai ma videos sa o latou mauaina peitai fai mai le faamatalaga a le sui pule Chris Wood e pei ona aofia i le lipoti e le o mafai ona faia se faamatalaga a le aoga i ni tuuaiga e faatatau i tagata taitoatasi, o loo suesueina foi e le aoga faitioga e maua atu.
