Ua faamaonia ma faailoa mai e leoleo, i se tasi o matāupu na o latou tuliloa ai i faaitu o Invercargill se taavale i le vaiaso na te’a nei, e faamauina na iai se pepe i totonu o le taavale i le taimi na alia’e ai le faafitauli.
I ripoti mai le NZ Herald e tusa ai ma talaaga o lenei matāupu, e faapea na taumafai atu leoleo e talanoa i le ave taavale i ni matāupu tau taavale lava. Ae i le taumafai atu ai o malu o malo ae sola ese lea tagata i le taavale. O lea na tuliloa atu ai loa e malu o malo.
I tulaga o le sailia ma le tuliloa atu ai e leoleo o lenei taavale, na faatino ai e sui o le auaunaga se tasi o metotia; o le tuu ai i luga o le ala tele o ni auupega ma’ama’ai poo spikes e iloa ai i le Gagana Peretania.
O i lea na pāpā ai pa’u o le taavale ma lavea ai i saute o Winton. Faamauina le molia ai e leoleo o se tama’ita’i na i totonu o le taavale i moliaga tau fuala’au faasāina ma le talepe fale, a o le ‘ave taavale ua molia i le moliaga fesoota’i lea i matāupu na tuliloa atu ai le taavale (pursuit).
Faamaonia e leoleo, na aafia le avetaavale, ae ua na o ni manu’a mitimiti, ae o le isi to’alua e aofia ai le ‘alu’alutoto e le’i afāina.
Ta’ua e le ta’ita’i leoleo asiasi – Inspector Bowman, na iai lava le pepe i totonu o le taavale i le taimi atoa na tuli atu ai e leoleo lea taavale.
E le’i faapea na iloa e sui o le auaunaga le iai o lenei tamaitiiti, ae faatino a latou gaioiga e taofi ai le taavale.
O le aso 8 o Tesema o le a toe tula’i ai le alii e 32 tausaga le matua na faafoea le taavale i luma o le Faamasinoga Faaitumalo a Invercargill ae o le aso 11 o le a tula’i ai le tama’ita’i e 30 tausaga le matua i luma o le faamasinoga lava lea e tasi e tali i ona moliaga.
Puna o Faamatalaga: https://www.nzherald.co.nz/nz/baby-in-fleeing-car-as-invercargill-police-pursuit-ends-in-sh6-crash/
