Ua faamatala e se tasi o taitai o le komiuniti, Dave Letele i le One News lona agaga faafetai ina ua maua atu se fesoasoani i taumafaiga faaauau pea o loo faia e fesoasoani ai i tagata ina ua ofo atu le tau’au o le kamupani a le Z Energy ma sainia ai se maliega ma le BBM Motivation.
Ta’ua i le lipoti sa faamalosia ona faaitiitia le lagolago a le BBM Motivation lea e faaauluulu ia Letele ina ua muta le fesoasoani mai le malo.
E tolu faletoleni poo gyms e faagaioia e le BBM i le itu i Sisifo ma Saute o Aukilani atoa ai ma se community kitchen i Manukau, se social supamaketi i Tokoroa ma le food bank i Wiri.
Peitai ua ta’ua i le One News talu ai nei sa feagai ai le faalapotopotoga ma nai faigata ona o le lē lava o le tupe mai le malo e faatupe ai, peitai la ua faamaonia e Letele i le faatalanoaga ma le One News, ua maua mai sia vaafaaola ma o le a fesoasoani i tau mo le faagaioia ma le fesoasoani i tupe faaalu i tau o penisini, fuel.
Na ta’ua e Letele e telē se faamāmā avega o lenei fesoasoni mo ia ma o le a faaitiitia ai le taulai atu i le itu tau tupe mo le faatupeina o fesoasoani ae o le a faatele le taulai o le vaai i le galuega o loo manaomia ona faatino e fesoasoani ai i tagata.
