O se polokalame tāua tele e faaigoa i le faaperetania Point of Difference Studios i Shepparton, ua avea lea ma fesoasoani mo nisi o nai o tatou tagata o loo faigaluega ai i lea faaitu o Ausetalia ina ia maua fesoasoani i le soifuaga i aso taitasi aemaise o mea e manaomia e pei o laisene avetaavale.
O le polokalame lea ua faagaioia i le fesoasoani tau tupe mai le matagaluega o le soifua maloloina i Vitoria lea e faaigoa Partners of Change.
O loo lipotia i le ABC i le vaiaso nei o nei faalapotopotoga poo polokalame foi ua maua ai le avanoa o nisi o nai tagata faigaluega Samoa i galuega faavaitaimi ma i latou e iai visa le tumau e talosaga ai mo ni laisene avetaavale i Ausetalia ma o le susuga Leleiga Fetui le isi ua muai saini ai i le polokalame lea mo se laisene avetaavale.
O i latou o loo tuufaatasia nei polokalame latou te faamalamalamaina i le faaperetania ma gagana a atumotu o le Pasefika, tulafono ma mea e ao ona malamalama ai sui auai ma o se tasi o i latou ia o se tasi foi alo o Samoa, Niko Ifopo o loo galue ai i le faatautaia o nei polokalame.
O le process poo le faagaioiga o lea tulaga, afai a maua le learners permit o sui auai ma iai foi laisene mai o latou atunuu faataitaiga o Samoa, ona faamaonia lea o laisene ia, fai le suega avetaavale ma afai e pasi ona agai sa’o loa i le full licence laisene avetaavale Ausetalia.
