O se tasi o tagata sa tau sailia a Ausetalia ua maua nei sa lafi i le ana o se vaafaila na agai ese ma Darwin i le aso ananafi.
O Mark Horne le suafa o lea tagata na tau sailia mai e leoleo talu mai Oketopa lea na feta’ua’ina ai lona aveesea o le masini eletise a leoleo le monitoring bracelet sa mataitu ai le vaega o iai i Sini ma sola ese ai.
O loo lipotia na aafia i se faalavelave na fanaina ai se aveloli i le 2020 ma ua feta’ua’ina e leoleo na gaoia ai ma se vaegatupe tele e 550 afe mai le loli lea ae na faasaoina le aveloli.
Ua maua la e leoleo le alii lea i le aoauli ananafi a o taumafai ai e sola ese i le vaa lea mai Cullen Bay ma o le Aso Gafua o muamua e tulai ai i le faamasinoga.
