Ua maua le avanoa o le tusitala Kiwi ia Charlotte Bellis e foi mai ai e fanau I Niu Sila
O le faamaoniga lea mai le sui palemia Grant Robertson I le aso ananafi I le maea lauiloa ai I ripoti I le lalolagi o fetusiaiga I le va o Bellis ma le pulega o loo vaaia nofoaga faanofoesea
O Bellis o loo tauave lana uluai pepe teine ma ona o tulaga faigata I le atunuu o loo nofo ai, Afghanistan o lea na talosaga mai ai e fia foi mai I lona atunuu e ola ai
I le muai teena o le talosaga a le tamaitai tusitala na saili mai ai sona avanoa I nofoaga faanofoesea, na toe sulu ai lava I le Taliban mo se fesoasoani, ma o le toe maua o le voucher ananafi faatasi ai ma le faasalalauga na tuuina mai e le sui palemia, na faaalia ai le fiafia tele o le tusitala
Ma e ui la I le tele o feuiaiga ma faigata o le masina o Mati lea ua fuafua e faimalaga mai ai
I luga o le social media, e eseese finagalo faaalia o tagata Kiwi o loo poloka I atunuu mamao ona o nofoaga faanofoesea, o nisi o loo malamalama I le faigata o iai le tamaitai tusitala ao nisi ua fiu e talosaga e le manuia e le o fiafia ona e foliga mai seiloga e faasalalau e le media faatoa liuliu le tofa
