O se mataupu o loo taatele i talanoaga a le lautele i le vaiaso nei o le mataupu e faatatau i le asosi netipolo a Ausetalia ma le tulaga o loo iai i le taimi nei atoa ma le fesoasoani tupe e 15 miliona mai le tamaitai milionea o Gina Rinehart e lagolago ai le asosi mo le isi fa tausaga.
O le vaiaso nei ua folafola mai ai e le Netball Australia le faasee ese o le taitaifono o le faalapotopotoga o Marina Go mai lona tofiga ae ua filifilia le faatonu fou o Wendy Archer e amata aloaia loa.
E lei leva atu nei ona lipotia le tulaga faaletonu o iai le Netball Australia ma le tulaga tau tupe ae o lea ua maua le fesoasoani e ui e iai nai mataupu o loo eseese ai taofi o i latou o loo faagaioia le Netball Australia.
Ua faafetaia e le Netball Australia le fesoasoani mai ia Rinehart ma le Hancock Prospecting ma teena foi nisi o lipoti e faapea ua mumusu sui o le au netipolo a Ausetalia e laei le togiga ia latou taaloga e lua ua mae’a o le Constellation Cup, e mafua mai ona o le igoa o le kamupani lea ua lolomi i luga o le ofu.
