O se tulaga maualuga ua ausia e le Fijian Drua ina ua maua lona avanoa i le quaterfinals o le Super Rugby Pacific ae faatoa faalua ai lea ona auai i lea taamilosaga faavaomalo.
O le malo a le Drua i le Reds i Suva ua mautu ai le avanoa, i ‘ai o le taaloga Drua 43-Reds 17.
O le isi tala fiafia mai le taamilosaga lava lea, o le maua lea o le uluai manumalo a le Moana Pasifika i lana taaloga talu ai na fetaua’i ai ma le Waratahs i ‘ai e 33-24.
O ‘au fou ia e lua o le taamilosaga sa amata mai i le tausaga talu ai ma ua faatulaga la o Quaterfinals i le faaiuga o le vaiaso o le a taaalo ai le Chiefs ma le Reds, Crusaders ma le Drua, Hurricanes ma le Brumbies ma le Blues e fetaui ma le Waratahs.
