I le masina na te’a nei o Mati sa faatulaga e su’esu’e ai le moliaga o le fasioti tagata faamoemoeina o loo molia ai Edward Fanueli lea na mafua ai le maliu o se tamaitai sa galue o se leoleo o le malo, o lea ua toe faatulaga le masina o Iulai o le tausaga nei e su’esu’e ai molimau.

Ua maua e leoleo i se sa’iliga na faaaogā ai ni tusi saisai na faatonuina e le faamasinoga, molimau autū e to’alua a leoleo sa le’i oo atu i le valaauga ia Mati o le matāupu lenei ma mafua ai ona lē faataunuuina su’esu’ega.

Ua faailoa mai e le loia a leoleo ua lē nofo taofia molimau ae ave iai le lapata’iga ma le fautuaga e tatau ona oo atu mo a la molimau pe a toe valaau le moliaga o Edward Fanueli ia Iulai.

O loo faaauau ona tatala i ni aiaiga lē o loo molia e faatali ai le vaiaso e amatalia i le aso 28 o Iulai e faia ai lenei faamasinoga.