O se tala fiafia mo le mamalu o Samoa i lenei atunuu, o lea ua faailoa mai e le vaega o Tausi Mavaega poo le Public Trust, ua maua nei i le gagana Samoa se tusitusiga ua faamatalatala ai mataupu e uiga i Uili poo Mavaega Tusia.
O le tusi “Mavaega Tusia ma Sui Fofoga Fa’aletulafono” o le tusi ua mae’a ona faaliliuina atoa i le gagana Samoa, ma ua fetaui lelei le maua mai o lenei tusi ma le taimi o le tausaga lea foi ua oo i ai, e faatāua ai i totonu o Niu Sila le gagana Samoa 2023.
E amata i le Aso Gafua ona mafai ona download lenei tusi mai le upega tafailagi a le Public Trust, ma o le vaega mo faaliliuga a le Department of Internal Affairs, na saunia maia lenei faaliliuga.
E le gata la i lenei tusi ua saunia i le gagana Samoa, ae o loo avanoa foi nisi o le aufaigaluega o loo faaaogaina le gagana Samoa, e mafai ona fesoasoani mai ia i latou e fia maua se fesoasoani i le faatulagaina o a latou mavaega tusia poo uili.
