Ua maua lelei e leoleo falepuipui i Niu Sa Uelese ni fuafuaga e feaveai ai fualaau faasāina ma nisi o mea e faasā ona aveina ane i totonu o falepuipui i le setete e faaauala ane i umukuka tulou i falepuipui.
Ua lipotia na maua ni fualaau, sikaleti, vapes, telefoni feaveai ma fafagamaa i totonu o nisi o pusa i le falepuipui o Windsor, fai mai leoleo o pusa na momoli atu e se tagata e lē o iloa.
E talitonu leoleo falepuipui o loo faaauala atu le aveina atu o ia oloa faasāina i le vaega e kukaina ma gaosia ai taumafa a pagota i vaiaso taitasi.
O loo maua lelei i meapueata i le nofoaga se tagata o loo ia la’u ane pusa ia mai le pito i tua o se taavale ma tuu i tua o le vaega lea o le umukuka e la’u ane ai i totonu faatau.
E le o iloa pe o malamalama ma iloa e le tagata lea mea o loo i totonu o pusa ia ae pe sa faatonu foi o se courier mo se tagata.
Ua faaleaogaina uma e leoleo fualaau faasāina na maua i ia pusa.
