O se tala fiafia i le atina’e o tagata tafafao i Samoa le manumālō ai o se tasi o faletalimalo i le atunuu le Return To Paradise poo le Toe Foi i le Parataiso i Matautu Lefaga, o le faailoga o le faletalimalo ua filifilia e tagata malaga poo le Traveller’s Choice award.

O le 10 pasene o faletalimalo uma i le lalolagi sa faia iai le filifiliga ua ausia ai e lea faletalimalo i Samoa lea faailoga.

E pei ona silafia o lea ua silia nei ma le lua tausaga talu ona toe foi auaunaga masani o lea atina’e i tulaga sa iai muamua, ona sa matuā faaletonu ona o vavao sa faatino ona o puipuiga o atunuu uma mai le faama’i Koviti-19.

E le’i ese ai Samoa mai isi atunuu i le atina’e o tagata tafafao i le ogaoga o faaletonu na aafia ai ona o lea faama’i na aafia uma ai atunuu o le lalolagi.