O aiga i le nuu o Faletagloa Safune i Savaii e le’i oo iai le eletise, o le a faamanuiaina i se fesoasoani mai Ausetalia o mōlī e ola i le malosi o le lā mai le eletise e maua i malosi’aga faafouina.
O se tala fiafia lea mo ia aiga a o sauni e faamanatu le Kerisimasi, auā ua mafai e lea fesoasoani ona faaoo atu le eletise o se tasi o auaunaga e mana’omia tele e tagata soifua uma.
O lea afio’aga ua aofia i le aofa’iga e 57 o faalapotopotoga tuma’oti ua faamanuiaina talosaga mai se fesoasoani a le malo o Ausetalia e maua ai vaegātupe mai le polokalame a le lalolagi mo le si’osi’omaga e ta’ua o le Global Environment Facility ae faatino e le UNDP ona galuega e pei ona sa iloilo ai talosaga e 113 ae 57 na faamanuiaina.
Ua ave ai le faamanuia a le faalapotopotoga o polokalame o le atina’e a Malo Aufaatasi le UNDP i faalapotopotoga ua talia talosaga mo fesoasoani mai lea polokalame.
