Na maua le tina sa faimalaga mai fafo ma fualaau faasāina e nanā mai totonu o fagu shampoo.

O cocaine ua toe maua nei e faapea na faalafi mai i totonu o le atopau ma o loo utu i fagu shampoo ma isi fagu faapei o ni kulimi mo le lauulu.

O le tina o se tasi o le pasese o le faigamalaga na taunuu mai Dubai i le aso malolo o le ANZAC i le malaevaalele i Aukilani.

E 3.25 kilokalama le mamafa o cocaine ma le 2.25 lita o cocaine suavaia ma o le tina o ia o se tagatanuu mai fafo.

O le maua ai e le vaega o tiute na taofia ai loa ma o lea na tu i luma o le faamasinoga faaitumalo i Manukau ananafi.

E tusa ma le $2.75 miliona le tau atoa o fualaau faasāina o lea na taumafai lē ua molia e aumai faananā i totonu o le atunuu, peitai o lea ua maua.