Ua maliu lē sa i totonu o le fale i Henderson i Aukilani lea na alu ai le Aso Faraile atoa o taumafai leoleo e faatalanoa ina ia sau i fafo.
O le taeao o le Aso Faraile faatoa uma atu pe tusa o le itula e 7 lea e faapea na taunuu atu ai leoleo i le fale i Henderson peitai na faafeiloaia mai e pulufana na tafana ane.
Na aveesea faatopetope mai ai ma nisi o aiga o loo nonofo latalata ane faapea ai ma le tapunia o se tasi o aoga i lea pitonuu, Holy Cross Catholic.
Ta’ua e leoleo mai le taeao ae faatoa mafai ona sao i totonu o le fale i le afiafi, ma maua ai lona tino maliu.
Ua faamautinoa mai ai e le ofisa i le komiuniti e le o iai se tulaga lamatia i tagata lautele ona o le mea na tupu peitai o le a faaauau pea ona vaaia leoleo i lea vaega o Aukilani mo suesuega.
O lē ua maliu e faapea o se tasi o sui o se kegi.
