Ua amata tapena itumalo o Vaa o Fonoti, Faleata 4 ma Siumu i se aso o le a faatino ai le latou filifiliga i le toe sailia o ni o latou sui usufono i le Palemene ina ua avanoa ai nofoa o ia itumalo ona ua faamavae ma le vaega e puipuia aiātatau a tagata, o latou sui faipule sa seei i tofi.

O le momoliga e ia itumalo o tamalii sa umia ia tofi faipule e tauva mo le vaega faaupufai o le Faatuatua i le Atua Samoa ua Tasi, e lei vaaia ai ni palapala a malo poo ni faaaloaloga masani a le atunuu. 

Ua mafua lea tulaga ona sa faailoa e le taitaifono o lea pati faaupufai i sui o itumalo na auai, ua ma’ai mata o le tulafono, ma e lē o moemoenoa foi le au mātau ma le au faalele e vaavaai masei i ni auala e lepeti ai le faaiuga o palota laiti, ma e le toe fia oo i nisi o finauga sa taunuu i le faamasinoga ona o tuuaiga o moliaga o faatosina.

Le taitaifono o le vaega faaupufai o le Faatuatua i le Atua Samoa ua Tasi, se tasi o minisita o le Kapeneta, susuga Laauli Leuatea Polataivao Fosi Schmidt.

O le faaiuga o le vaiaso ua mavae atu nei na momoli ai sui sa umia nofoa o itumalo o Vaa o Fonoti, le tofa Mau’u Siaosi Puepuemai, le tofa Ale Vena Ale sa seei i le tofi o Faleata 4 ma le tofi o Siumu le tofa Tu’uu Anasii Leota, i le vaega faaupufai o le Faatuatua i le Atua Samoa ua Tasi.

Ua mae’a sainia e ia tamalii pepa o maliega e avea ai ma sui lagolago o lea pati faaupufai ma ua faamautu foi o sui ia o lea vaega faaupufai mo palota laiti o loo loma.

Ua faailoa ai e le taitaifono i ia feiloaiga ma itumalo palota o le a toe faia a latou filifiliga, e le toe talia nisi sui faatutū mo le pati.

O tapenaga lava mo ia palota laiti o loo faagasolo foi tapenaga a le vaega e puipuia aiātatau a tagata e saili ni o latou sui faatutū, ma o se taimi pe a mautu ona faailoa lautele lea o ni o latoui sui tauva.

O le feiloaiga a tusitala ma le taitai o lea vaega faaupufai i le vaiaso na tea nei na faailoa ai se finagalo o le susuga Tuilaepa L Sailele Malielegaoi i le agaga na faia ai teuteuga o le tulafono o faigapalota e faasino i le faamavae o se faipule mai se vaega faaupufai sa lagolago iai.

Le taitai o le vaega e puipuia aiātatau a tagata, susuga Tuilaepa Lupesoliai Sailele Malielegaoi.

O nofoa ua avanoa nei sa manumalo ai lea pati faaupufai i le palota tele a le atunuu ia Aperila o le tausaga e 2021.

O le faailoa ai e nisi o itumalo ua avanoa nei nofoa ua tasi le finagalo i se sui tauva e aunoa ma se palota e faia, e faatoa mautinoa lea tulaga pe a mae’a le piliota e toe faaui ai i tua suafa o se sui poo ni sui tauva, ae ua na o le toatasi lava le sui ua faaulu ma lesitala le suafa mo le faiga filifiliga a se itumalo palota.