Ua molimauina i faasalalauga a le Pulega o feoaiga i le laueleele le Samoa Land Transport Authority, le faatino ai o galuega o le toe faavalita o le alatele autu o le taulaga o Apia, o se tasi o tapenaga a lo tatou Malo i le fono a Malo o le Taupulega, ua faatulaga e usuia i lo tatou atunuu ia Oketopa o le tausaga nei 2024.
A o lumanai lea galuega e pei ona toe faaleleia ai le auala autu o le taulaga le Beach Road, sa faailoa e le pulega o feoa’iga i le laueleele i le atunuu, le tapunia o nisi o magaala i le taulaga ona o le faatinoina o lea galuega.
O se vaega o le alatele i Matautu-tai ua leva tausaga o faaletonu, aemaise o lea alatele e tau atu i Vaiala, ua toe faavalita ma ua toe faaleleia ai lea vaega o le alatele sa faaletonu.
O le ituaiga o ta e ta’ua o le asphalt e lamolemole o loo faaaogā e valita ai le alatele autu o le taulaga, ma o loo faaaogāina foi lea ituaiga o ta i nisi o auala o le Malo o loo feoai ai taavale ma le mamalu o le atunuu.
