Ua faailoa e le ofisa o le vaaitau le iai o se taaviliga o matagi malolosi e ono avea ma matagi afā o le a faaigoaina o Mal.

O le afiafi o le Aso Gafua na faailoa ai lea taaviliga o matagi malolosi i le Vasa Pasefika i Saute ma e tu lata ma taavili mālie i ogasami i Matu o Vanuatu.

Peitai o loo iai le vaai mamao e agai i Fiti i le isi lua aso o lumanai.

E lē o iai se avanoa e agai sa’o mai i Samoa ae ono iai timuga e momoli mai e savili mo le Aso Tofi ma le Aso Faraile.

E ono siisii ai foi le sami mai le Aso Lulu pe afai e faatupulaia lona malosi. 

Faaalia e le ofisa vaaitau e ui e mamao ma Samoa lea taaviliga o matagi malolosi, ae ao ina mata’itu pea uaga ma galu i gataifale mo lenei vaiaso.

E ao foi i o tatou tagatanuu o loo aumau i Fiti ona mulimulitai i fautuaga mai i le Ofisa Vaaitau a lea atunuu tuaoi.