Ese mai le toe faatulagana fou o pulega a le matagaluega a le soifua mālōlōina i le aso a taeao, o lea foi o le a amata aloa’ia le matagaluega fou mo tagata e iai mana’oga faapitoa.
Ministry for Disabled People o le matagaluega fou lea o le a aloa’ia mai a taeao e lotea tupe ma pulea auaunaga patino i tagata e iai mana’oga faapitoa.
O le a aveesea mai ai ia auaunaga mai le soifua mālōlōina faapea isi matagaluega a le malo o loo iai faatasi i le taimi nei.
$2 piliona ua faaagaga mo le matagaluega e aofia ai ma le $735 miliona faaopoopo o le paketi o lenei tausaga e fesoasoani i le alu i luga o tau o auaunaga patino ia i latou e lē atoatoa le malosi.
A o tapena ai le vaa o le matagaluega fou, mai ia Huhana Hickey o le sui o le Establishment Governance Group a le matagaluega, e iai lona popolega e le’i lava tapena le matagaluega fou masalo poo le isi tausaga ma o le faatatope e ono lē maua atoa ai le sini na ala ai ona faafanau le matagaluega.
O le faatū ai o le matagaluega fou lenei ua faia e le malo ona e lē o lelei le system o iai nei, ma e tele itu e lape ai ma lē maua ai e i latou e lē atoatoa le malosi o avanoa tutusa.
O le aso a taeao e iloa ai le igoa aloa’ia o le matagaluega e lē gata i le faaperetania a o le faa-Maori, ma a o faatalitali ai faataatiaga o le matagaluega fou, o le aso foi a taeao o le a lē toe iai ni District Health Boards lea o loo pulea auaunaga faalesoifua mālōlōina i itumalo ae o le a pulea e le Health NZ ma le Maori Health Authority, ma o nei pulega uma e lua o le a faamautu i Ueligitone.
