O le siamupini o le taamilosaga o le taaloga volipolo o le Teuila ma le 60 Tausaga o le Tutoatasi, toe siamupini foi i le taamilosaga volipolo o le vaiaso o le Mosooi i Amerika Samoa i le tausaga nei, le Knights volleyball club mai Vaitele fou, o le a tausinio ma se tasi o auvolipolo mai Samoa o le I’a Sa mai le afioaga o Luatuanuu, i le taamilosaga a le asosi volipolo a Manukau i Aukilani i Niu Sila poo le Manukau Auckland Volleyball Association e faia i le vaiaso muamua o Ianuari o le tausaga fou.

Na faaalia e le faiaoga o le Knights volleyball club le susuga Nifae Magele o le latou ‘au ua filifilia ua aofia ai le toafitu mai Samoa, ae toatasi le sui mai Niu Sila ma le isi toatasi mai Ausetalia. 

Le faiaoga o le Knights volleyball club mai Vaitele fou, susuga Nifae Magele. O le taitai malaga o le faletua o Seigafo Mara Magele ma o le aso 2 i le aso 7 o Ianuari 2023 e faagasolo ai le taamilosaga volipolo a le asosi o lenei taaloga i Manukau Niu Sila o le a tausinio ai le Knights ma le I’a Sa mai Samoa.