E 35 le aofa’i o le aumalaga o le ‘au a le Apia Maroon o lea na malaga atu i Samoa e auai atu i le faamanatuina o le 100 tausaga talu ona faavae mai le lakapi i totonu o Apia.
O lea aumalaga e aofia ai le komiti faafoe ma le pulega e to’asefulu faapea ma tama taaalo e 25.
O le vaiaso ua mavae na amata gasolo ai nisi o le komiti i Samoa ae o le Aso Sa ua mavae 8 o Setema na tuua ai e le au atoa Aukilani mo Samoa.
E ui e lē faigofie tapenaga o malaga faapenei aemaise lava i tulaga i seleni ae ua a’e lava se tofa i le afioga i le peresetene ma le laulau e tatau lava ona ave le ‘au a le Apia Maroon i Aukilani i le faamoemoe o le afioaga o Apia e ala i le faamanatuina o lona selau tausaga o le lakapi.
O le laualuga foi i finagalo o le laulau a le ‘au o le Apia Maroon, e lē sau faalua se faamanatuina o se selau tausaga i faamoemoe faapenei.
Ua faailoa foi le agaga fiafia o tama taaalo uma o le ‘au ina ua tapena lenei faamoemoe, auā o le to’atele o tama taaalo o le latou taimi muamua lenei ua tuua ai aiga ae malaga atu i Samoa.
E 22 ‘au na auai i le faamoemoe ae tasi lava le ‘au na malaga atu i fafo na o le Apia Maroon.
Ta’ua e le afioga ia Vainalepa Mano o le aao tusitusi lea o le mafutaga, e lē o faatamala tapenaga o le au i le malaga atu i Samoa, o loo iai lava le naunautaiga o le afioga i le faiaoga ia Namulauulu Fomai ma le pulega faapea le komiti e tatau ona foi mai le au ma le siamupini o le 100 tausaga.
O sailiga seleni sa tagi lava i lima o le ‘au lona faatinoina lea na tapena ai mea uma.
Auā e lē gata i le faamanatuina o le selau tausaga o le lakapi i Apia ae faapea foi le umusaina o le vaa fou a Apia lea ua uma ona fausia.
