O le faailoa ai e le matāgaluega o leoleo, falepuipui ma le toe fuata’ina e sese ma e lē sa’o ni tuua’iga i se tusi a le tamaitai o Lise Marie Schmidt e pei ona faailoa ai ni aafiaga o le ta’ita’i o le Malo le afioga i le tamaitai Palemia, i le maliu o le tamaitai Polofesa o Caroline Sinavaiana Garbbard, i le masina o Me o le tausaga ua mavae.
Ua faailoa e le Komesina o leoleo le tofa Auapaau Logoitino Filipo, o se isi tusi a Lise na ave i le Ao o le Malo na faailoa ai ia tuua’iga ma talosaga ai lea tamaitai i se puipuiga mo ia, ina ne’i faaaogā e le Palemia lona malosi’aga faaletulafono o le ta’ita’i o le malo, e faatino ai se gaioiga e taofia ai le faia o le mea moni ma le amiotonu.
Peitai i se finagalo o le Komesina i se talanoaga ma nisi o auaunaga tau faasalalauga ua faaalia ai e Auapaau ua iai masaloga o leoleo e iai ni gaioiga faapolokiki o loo lalafi mai tua o le tusi na ave i le Ao o le Malo.
Ua faailoa lea finagalo o le komesina i le WTMedia ma faamatala ai e le komesina ua tele taimi ma tupe ua faaalu e leoleo i a latou su’esu’ega i le tusi o loo faailoa ai ia tuua’iga, ae leai ma ni mau e faamaonia ai.
O le auaunaga faasalalau i luga o upega tafa’ilagi le Tautai A’e i Niu Sila sa faatalanoa ai i se latou polokalame le tusi a Lise e faatatau lava i tuua’iga i le Palemia, ua faaalia e le Komesina o leoleo o loo tapena le faia iai o ni moliaga solitulafono.
Le Komesina o leoleo le tofa Auapaau Logoitino Filipo.
O le aso 15 o le masina fou o Aperila le valaauga muamua o moliaga o Lise Marie Schmidt i le Faamasinoga Faaitumalo.
O loo molia o ia i le faia o ni faamatalaga e lē sa’o e ala i ni tuua’iga i le aafia o le Palemia i le maliu o le tamaitai Polofesa o Caroline Sinavaiana Garbbard, ma le moliaga o le tuuina atu o faamatalaga e faasese ai leoleo.
