E ono le to’atasi le tagata maliu e ana totoga (tulou) lea na maua e le aiga Manurewa, Aukilani i totonu o le atopau.
O le mataupu lenei o loo faaauau pea su’esu’ega, ma e faapea o lea atopau na faatau atu i lea aiga mai le faatautu’i na faia i le vaiaso talu ai e kilia pe faamamā ese ai le storage poo le fale na teu ai i le vaiaso talu ai.
I lipoti a le Herald o loo ta’ua ai e ono lē to’atasi lē e ana nei itutino, ma o ni lipoti e lē o mafai ona faamaonia mai e leoleo i le taimi nei.
E lē talitonu leoleo e iai se sootaga o le aiga na mauaina le atopau ma itutino ua su’esu’eina nei.
I se isi lipoti lata mai o lenei lava faalavelave, o loo ta’ua ai i le NZ Herald, mai su’esu’ega na faia i toega o itutino na maua i totonu o atopa’u, e iai le talitonuga o leoleo, o ni tamaiti laiti o le matutua o tausaga o tamaiti a’oga tulagalua e ona toega nei o itutino.
E talitonu foi leoleo ma i latou na faia su’esu’ega, e foliga mai e tele ni tausaga ua tuana’i na uma ai ola o nei tamaiti, ma e foliga mai ai ua tele ai foi tausaga talu ona iai tino o nei tamaiti i totonu o atopa’u.
E pei ona mua’i ta’ua, o toega nei o tino o nei tamaiti, na maua i totonu o ni atopa’u sa faatau mai se faatautu’i (auction) sa faia i ni oloa ua leai se tasi e onaina pe ua tuulafoa’ia (abandoned goods) i se nofoaga storage unit o loo iai i Aukilani i Saute.
O le amataga o le asō na ta’ua ai i le tele o ni lipoti e faapea o ni toega o itutino o ni tamaiti, ma o lea na toe faamaonia mulimuli mai na lipoti e le susuga i le Detective Inspector Tofilau Faamanuia Vaaelua.
Saunoa Vaaelua, o loo faaauau pea a latou su’esu’ega ae o se isi itu atonu e tau fesoasoani mai, o le a aga’i ai su’esu’ega i le kamupani e iai le storage unit lea na teu ai nei atopa’u. O le isi itu lea e tau ataata mai ai le tulaga lelei o su’esu’ega o loo aga’i i o la DNA.
Na ia ta’ua foi e iai le talitonuga o tamaiti nei ei le va o le 5 i le 10 tausaga le matutua i le taimi na uma ai o la ola, ae o loo taumafai pea leoleo ia matuā faamausalī lena lipoti.
