Ua mapu ane le Manu Samoa i se malologa puupuu mai taaloga faitaulia e lua ua manumalo ai ia Italia ma Sepania, ona toe sauniuni lea ma tapena i le taamilosaga o le Ipu a le Pasefika le Pacific Nations Cup lea ua faatulaga mai e amata i le aso 24 o le masina fou o Aukuso seia oo i le aso 22 o Setema.
E ono atunuu o le a tausinio a latou ‘au i le taamilosaga o lenei tausaga lea ua lē gata i ‘au a Fiti, Tonga, Samoa ma Iapani, ae o le a tausinio ai ‘au a Kanata ma Amerika.
Ua faailoa e le faiaoga ulu o le Manu Samoa i le mae’a o le taaloga a Sepania i le Aso Toonai na te’a nei, e lē o se tapenaga i se selau mita o le a feagai ma le tatou ‘au mo le taamilosaga o le Ipu a le Pasefika, ae o tapenaga o le malafoni.
E ui foi ina tasi le vaiaso sa tapena ai mo taaloga faitaulia ua mae’a, ma le loulouā o uiga o le tau i le mamafa o timuga i le taaloga ma Sepania ae na manumalo i ‘ai e 34 i le 30.
