Ua maua nei le pine auro a Samoa i Taaloga o Malo o le Taupulega o loo faia i Birmingham i Peretania ina ua suipi le alii o Don Opeloge i le vaega o alii 96kg le mamafa.
Ua faamauina ai foi lona tata’e o se matāti’a o le sii malele (snatch) ina ua ia siia le mamafa e 171kg, e oo i le sii mālōlō (clean and jerk) na mataina lana taumafaiga ma sii le mamafa e 210kg. Tuufaatasiga atoa ua ia faatūina ai se matāti’a fou mo taaloga o le taupulega mo le vaega o alii 96kg le mamafa i le 381kg.
O le tausaga e 2018 na faamanuiaina ai foi lea alii talavou i Taaloga o Malo o le Taupulega sa faia i Gold Coast i Ausetalia ma manumalo ai i le pine siliva peitai o le tausaga nei ua unai ai lona malosi ma manumalo i le pine auro mo lona atunuu.
Na mata’ina le lagolago a sui o le aumalaga a Samoa e molimauina lea matāti’a tāua, na vaaia le siva fiafia o Don Opeloge ina ua mae’a se tasi o ana siva ma ua ia mautinoa ua manumalo i le pine auro.
O le alii mai Fiti ia Taniela Rainibogi na tula’i mai i le tulaga tolu ma faamanuiaina i le pine apamemea. I le mae’a o le faaulaina o pine a i latou e to’atolu na aveese e Don lana ulafala ma faaula ai lona uso mai Fiti.
O le afiafi o le Aso Lulu o le a sii ai se tasi o alo o Samoa ia Jack Opeloge mo le vaega o alii 109kg le mamafa, ona sosoo ai lea ma le tamaitai o Feagaiga Stowers i le taeao o le Aso Tofi mo le vaega o tamaitai i le 87kg le mamafa.
