O mea faigaluega eseese mo le atiina a’e o faatoaga, o oloa faufale, ma oloa o masini faaonaponei mo fesootaiga ma oloa o meafale, ua masaa iai le tele o tupe o le poloketi o le tasi le miliona tala, lea ua mae’a faasoa le tai 200 afe tala i itumalo palota e 51 e fausia ma lisi ai nofoaga mo ofisa tutotonu, ma totogi ai foi tagata faigaluega ma alauni o sui o komiti o Fono Faavae.
O nisi o vaega tupe tetele ua sasaa atu i kamupani e faatau ai oloa o meafaigaluega mo faatoaga e pei ona sa molimauina i le faaiuga o le vaiaso na tea nei, uta o uili paelo, o iliafi, suo, agaese ma ulaoge poo to’i ma isi meafaigaluega e faaaoga i galuega o le poloketi.
Ua faaalia e se ofisa sinia o se tasi o kamupani i le taulaga o loo fulisia iai faatauga o ia mea faigaluega, o se vaitau ese lenei i le latou molimau, i le tele o oka o meafaigaluega ua faaoo atu ona o tapenaga a nuu o itumalo e 51 e faatau ai ia ituaiga o oloa.
O le molimau foi lea na ia faaalia o nisi o itumalo ua na o se vaega o meafaigaluega ua muamua faamatuu iai mo le taimi nei, ona ua tuai taunuu vaaoloa o loo aumai ai oloa nei e manaomia e nuu ma afioaga mo le poloketi tasi le miliona.
O isi oloa ua sili foi ona alumia talu ona amata faagaioi lea poloketi a le Malo, o oloa faufale mo le fausia o ofisa tutotonu.
Ua tuai foi ona taunuu vaaoloa ae ua maualuga le tulaga manaomia o taga sima, ma laupapa ma isi oloa faufale.
