Ua lipotia i le Stuff e toeititi 16 miliona na maua a se tasi o motel i Manukau lea na faaaogā e faanonofo ai tagata e lei iai ni fale e nonofo ai i le taimi o le koviti. O se tasi lea provider poo auaunaga na maua le ta’i miliona mai le malo i le taimi o feagai ai le atunuu ma faigata poo lu’itau foi i tulaga tau fale ma le siitia maualuga o le totogi ua iai nei.
O faamaumauga fou ua alia’e i le aso nei ua iloa ai na totogi e le matagaluega o le Social Development se vaegatupe e oo atu i le 788 miliona mo nofoaga nei e aumau ai i latou e tusa ma le 37,887 e lei iai ni mea e nonofo ai mai le va o Mati 2020 ia Iulai 2022.
Ua faaigoa e se tasi faipule o le National Chris Bishop lea faiga o se get rich quick scheme poo se faiga e vave milionea ai i latou e ana faletalimalo. O faamaumauga na faamatuu ane i le Stuff i lalo o le Official Information Act ma ta’ua i le lipoti, ua iloa ai o Mcentral Apartments i Aukilani i Saute e aupito i tele ai lana vaegatupe mai le matagaluega, e 15.8 miliona na maua mo le faanonofo ai o tagata e 621 i o latou fale.
O le faamatalaga mai le pule o le Social Development Karen Hosking ua ta’ua ai ua telē le mana’oga mo fale ia emergency housing ma o loo sioti foi fale ia o loo avanoa ane ma ua siitia foi tau ma o motels e lē o ni tali umi mo le faafitauli lea aemaise lava mo tagata o loo ma’ale’ale tulaga o loo iai.
