O loo soifua pea nisi a o isi ua fai i lagi le tuligasi’a, i latou o foma’i faauuina sa a’ooga i le a’oga faafoma’i i Fiti, na amata ai ona maua e Samoa ana lava tamafanau sa umia lea tomai ma sa galulue e tautua i le matāgaluega a le soifua mālōlōina i tausaga ua tuana’i.
O se tasi o tamalii o se foma’i e silafia e le to’atele o le susuga Dr Lance Eves ua 93 nei tausaga o lona soifua ae sa auai faatasi ma isi foma’i ua matutua foi tausaga o le soifua, i le faailogaina o le 140 tausaga o le a’oga faafoma’i i Fiti sa a’oa’oina ai.
O se sauniga na faia i lumāmaota o le malo i le eleele fou ma sa saunoa ai le tama’ita’i Sui Palemia le afioga Mulipola Anarosa Ale Molioo sa ia momoli le faafetai a le malo i le tautua matavela a foma’i sa a’oa’oina i Fiti ona o tomai eseese faafoma’i sa latou faauu ai ua faaaogā i le tautuaina o le malo ma le atunuu e ala i le auaunaga a le soifua mālōlōina.
O le tausaga e 1885 na faavaeina ai le a’oga faafoma’i i Fiti ma o le tausaga nei ua atoa ai le 140 tausaga talu ona faatūina.
Le tama’ita’i Minisita o Tupe o se tasi o Sui Palemia afioga Mulipola Anarosa Ale Molioo.
O le susuga i le alii foma’i le tofa Salausa Dr John Ah Ching sa ia faailoa se tala otooto o tamafanau a Samoa na a’oa’oina i le a’oga faafoma’i i Fiti i tausaga tau amata o lea a’oga i le tele o tausaga ua mavae.
Le susuga i le alii foma’i le tofa Salausa Dr John Ah Ching.
Ua iai lava i le taimi nei i le iunivesite aoao a Samoa le a’oga faafoma’i ua a’oa’oina ai tamafanau a le atunuu ae ua a’ooga ai foi ma nisi o alii ma tama’ita’i mai nisi o atunuu o le Pasefika.
