E manatu le amepasa o Saina e mafai ona fesoasoani ia Niu Sila e toe faaleleia mea ua faaleagaina mai le afā o Gabrielle aemaise o le faaleleia o nisi o vaega autu o loo moomia ai le fesoasoani.

I se tusi ua faailoa i le Newshub ua ta’ua ai e le amepasa o Saina i Niu Sila o Wang Xiaolong, o loo vaai Saina i avanoa e mafai ai ona galulue faatasi ma Niu Sila ma e iai foi le talaaga o Saina i le faatupeina ma le fesoasoani ai i poloketi faapea i le lalolagi atoa.

Fai mai a ia e vaai Saina i le avanoa lea e faamalosia ai sootaga ma atunuu e ui o loo iai faitioga a nisi e faapea e faaaoga e Saina le avanoa lea e faatupulaia ai lona malosiaga ma tuu ai nisi o atunuu o loo maua ia fesoasoani tau tupe i ni maunu tau aitalafu.

Saunoa le Palemia o Niu Sila i le vaiaso nei e le o fia faia sana faamatalaga i soo se ofo e tuuina atu i tulaga tau fesoasoani mai atunuu ae o loo faaauau pea ona taliaina e le atunuu fesoasoani e fetaui ma manaoga o iai ma o lona manatu e ese le matagofie o le lagona lea o le foai mai komiuniti faavaomalo e fia foai mo Niu Sila.