I le toe ai na o le fitu masina o totoe faataunuu le Ipu o le lalolagi i le lakapi 15, ua teena ai e le alii faiaoga ua filifilia nei o le Wallabies, Eddie Jones nisi o faamatalaga e faapea e le o lava le taimi e tapena ai ma toe sui le alavaa o le ‘au mo lea faamoemoe autu o le taaloga lakapi.
Fai mai lana faamatalaga i le Nine News i le vaiaso nei o loo tele le taimi ma e na te manatua ai se tala a se tasi faiaoga iloga o le taaloga o Bob Dwyer e faapea afai e le mafai ona e suia se ‘au i se vaiaso o lona uiga e le mafai ona e faiaoga.
O loo gugulu nisi e fiafia i le taaloga i le faaiuga ua faia e le Lakapi Ausetalia e tusa o le mataupu lenei lea na faailoa mai ai le latou faaiuga i le aso ananafi o le a toe foi ane Jones i le mae’a o tausaga e 18 na avea ai muamua ma faiaoga o le Wallabies.
Ua saini ai lana konekarate 5 tausaga, lona uiga e maua ai foi ma le isi Ipu o le lalolagi e sosoo ai.
E faanoanoa foi le toatele ona o le faamalolo o le faiaoga o Dave Rennie lea e manatu sa tatau ona tuu pea le avanoa ia Rennie e faamae’a ai lana galuega faiaoga i le Ipu o le lalolagi o le a sosoo ai.
