Ua asamo mai i Samoa le kamupani Niu Sila o le Kiwi Rail lea e ona le vaa Interislander e fealua’i i le va o motu i Saute ma Matu o Niu Sila, i le fia maua o ni alii vaa poo seila e galulue mo lea kamupani e pei ona mana’omia ni seila se to’a sefululima.
Ua ave ai nei le faatalauula a le kamupani vaa a le atunuu le Samoa Shipping company i alo ma fanau tama a le atunuu ua a’oa’oina i galuega i luga o vaa o le sami ina ia ave ni talosaga e maua ai ia avanoa, o se faitoto’a lelei e maua ai ni galuega ma selesele i ni totogi lelei.
O le isi itu tāua e lata mai Niu Sila pe a faatusa i le mamao o Europa o loo malaga iai nisi o aliivaa o le atunuu i galuega i vaa la’uoloa ma meli la’upasese. Ua na o alii seila mai le 25 i le 35 tausaga le matutua o loo mafai ona talosaga mo ia avanoa faigaluega.
