Ua lipotia o le susuga Alama Ieremia lea ua afea e le World Rugby mo sana fesoasoani i le aulakapi a le malo tele o Amerika mo ana tapenaga a o lei oo mai le Ipu o le lalolagi i le lakapi i le 2027 lea e talimalo ai Ausetalia.
Fai mai le One News i lana lipoti i le asō o Ieremia ua tuuina iai le matafaioi o le faiaoga tau osofaiga poo le attack coach a le Eagles ma ua ia faailoa i lea faatalanoaga, o le vaega tonu lea e fiafia ai ma ua ia vaaia e feololo foi tagata taaalo lakapi mai le Pasefika i Amerika aemaise lava i Utah.
Fai mai Ieremia e ui o le a vaavaai i le faatupulaia o le aofai o tama taaalo mai le Pasefika ae o le a vaavaai foi i nai isi tama taaalo e omai atunuu e leai ni talaaga i le lakapi.
O loo matuai manaomia se fesoasoani i le lakapi a Amerika ma ua faailoa foi e le alii faiaoga fou o se luitau tele.
O Alama Ieremia e pei ona silafia sa faiaoga lagolago foi i le Suntory i Iapani, aemaise i Ueligitone ma le Hurricanes, ae sa faiaogaulu i le ‘au a Aukilani ma le tatou Manu Samoa i tausaga ua tuanai.
