I le toe tatala ai o le malaevaalele i Fagalii i le aso ananafi na faaalia ai le finagalo a le Kapeteni o le vaalele a le Talofa Airways, Toleafoa Jeffrey Hunter e tusa ai ma nisi o vaega e ao ina faaleleia atili i le malaevaalele.

“E lelei, e manaia e latalata i Apia, faigofie mo tagata femalagaa’i, o le aufaipisinisi aemaise foi i turisi ae peitai e laititi le runway mo le faaaogaina i le taimi nei ma toe faatā i le ta lamolemole.

“O ituaiga maamaa ia mo le silafia o vaalele e o i le 100maila i le itula pe a oo ina sau e land, e tatau lava ona toe faaleleia.

“O la’u tala lava lea e fai i tulaga o vaega laiti nei i le auala sesee, there is no room for error here at Fagalii airport, aua e na o le sese lava o le avevaalele ia ua iai le faaletonu ona o le tulaga o le laititi o le space.

“E lelei lava le tulaga o le malaevaalele, ua leva ona ou toe fia foi mai e faaalu la’u vaalele iinei i Fagalii ae e ao lava ina faaleleia ma ia mautu loa.”

O le taimi nei o loo faia pea faatalanoaga a le Talofa Airways ma le Pulega o Malaevaalele i Samoa.

“O lea matou te talanoa ma le vaega lea a le malaevaalele, e tuu lava i luma ia i latou, o matou ia na o le logologo atu lava a o latou e faatinoina.”

I le saunoaga a le Afioga i le Minisita o loo gafa ma lenei atina’e, Olo Fiti Afoa Vaai o loo faagasolo pea nisi o vaega ina ia tino ai loa lenei atina’e i sona tulaga mautu ma lelei.

O le kamupani vaalele lenei a le Talofa o loo vaavaalua ma le Samoa Airways i le auaunaga e ala i femalagaa’iga a le mamalu o le atunuu mai Upolu mo Amerika Samoa aemaise ai foi le motu tele i Salafai.