I le tapena ai o matua ma fanau i le toe a’e o aoga, peitai o le utiuti o faiaoga i le tatou atunuu,  ose faaletonu e le na o Samoa o loo aafia ai. 

Pei ona saunoa le Faatonusili o le Matagaluega o Aoga Taaloga ma Aganuu, Susuga A’eau Chris Hazelman i le tatou faatalanoaga, o se aafiaga o loo tupu i le lalolagi atoa. 

Peitai i Samoa lava ia, o loo maua pea le faatagaga mai le Matagaluega ma le Malo e toe galulue ai faiaoga litaea e fesoasoani i fanau aemaise o aoga i nuu. 

O le utiuti o faiaoga i nuu i tua, ua oo ai se manatu i le pulega, e tuufaatasia nisi o aiga i nuu, peitai e leiloa se taimi e tupu ai lena manaoga, talu e iai foi itu e faafaifaigata ai aemaise lava i aoga i nuu ma itumalo. 

O le isi metotia o loo tagai iai le Matagaluega, e pei ona saunoa le Faatonusili, poo le faia foi o nisi vasega i luga o fesootaiga televave, ae manaomia foi le taimi e faia ai na tapenaga.