E lei manuia le uluai taaloga a le Toa Samoa i le taamilosaga o le Pacific Championship lea sa fetaui ai ma le ‘au malosi mai Ausetalia, le Kangaroos i le po o le Aso Toonai ua mavae i le malae i Townsville.
Maitauina le faatumulia o lea malae i le aumaimoa ma le autapuai a Samoa se’i latou tapuaia faiva o alo o le atunuu a o fetauia ai ma le ‘au numera tasi i le lalolagi o le lakapi liki.
O le ‘afa muamua o le taaloga na molimauina ai le osofai malosi o le ‘au mai Ausetalia e faailoa le latou ma’ema’eā a o faagasolo le taaloga.
O nisi o alo o Samoa o loo taaalo mai i le ‘au a le Kangaroos na iloa le malolosi o le latou taaalo, lea sa iu ai lava ina tofu i latou ma le sikoa o le taaloga.
O le susuga ia Payne Haas o se tasi o alo o Samoa sa tatalaina le laasia o le laina sikoa, ona sosoo atu ai lea ma le susuga ia Tino Faasuamaleaui faapea le alii Numera 3 ia Hamiso Tabuai Fidow lea sa lua ana sikoa.
O le vevesi mai ai o le Kangaroos i le ‘afa muamua o le taaloga, e lei faavaivai ai le Toa Samoa i le sailiga o sona ‘ai, lea sa iu ai lava ina laasia e le susuga ia Murray Taulagi le laina sikoa a o lei taina le ‘afa muamua o le taaloga.
O ‘ai o le ‘afa muamua Kangaroos 26 i le 6 a le Toa Samoa.
O le ‘afa lona lua o le taaloga, na iai le suiga o le taaalo a le Toa Samoa, i le malosi o lana laina i luma faapea le laina i tua.
Na toe laasia e le Kangaroos le laina sikoa ae na finau foi le Toa Samoa latou i sona ‘ai faaopoopo ma o lea sa iu ai lava ina laasia e le susuga ia Luciano Leilua le laina ma maua ai le isi ‘ai faaopoopo mo le Toa Samoa.
E mae’a le taaloga ua 38 ‘ai o le Kangaroos i le 12 ‘ai a le Toa Samoa.
Ma o lea ua sauni le ‘au a le atunuu e malaga mai i Niu Sila e fetaui ai ma le ‘au a le Kiwis i le malae o le Eden Park i le Aso Toonai o loo loma nei aso 21 o Oketopa.
