Ua sau le faai’uga o le iloiloga a le Employment Relations Authority, e lei uia e le matagaluega o aoga taiala uma sa tatau ona ia faia mo le vāea tele lea e lusi ai le tusa ma le 600 galuega.

O le faai’uga lea na sau ananafi ma le tala i lalo o le collective agreement sa tatau i le matagaluega ona galulue faatasi ma le iuni i le faatalanoaga o fuafuaga o le vāea, ma e lē tatau foi ona mafaufau e vāea tagata taitoatasi e aunoa ma se maliega ausia.

O le mataupu lenei na sulu ai le iuni i le tulafono e faatatau i le vāea tele lenei a le matagaluega, ma o le sau ai o le faai’uga ananafi ua lē iloa ai nei poo le ā le isi suiga o le a faia e le matagaluega, peitai mai le iuni e foliga mai o lea o le a toe talanoa ma le matagaluega i le vāea.

Ua fai mai ai ma le iuni ua tatau nei i le matagaluega ona toe vaavaai i voluntary redundancy faapea ai ma le faalagolago i konekarate mo galuega.

E leai se tala tele mai le matagaluega e tusa ma lipoti a le 1News, se’i vaganā o lea lava o le a toe logoina mai le aufaigaluega i le agai i luma aemaise o le toe feiloai ma le iuni i se taimi o i luma e ui e lē o mautinoa se aso.

E ui la ua tu nei i le taofi fuafuaga o le vāea a le matagaluega o aoga, ae o lea lava na faamautinoa mai e le matagaluega e lei mamao atu, e faia pea lava le vāea.

Puna o Faamatalaga: https://www.rnz.co.nz/news/national/522501/psa-claims-win-over-ministry-of-education-job-lay-offs#:~:text=The%20Public%20Service%20Association%20says,it%20on%20major%20change%20proposals.