Ua uma le ola o se tamaititi na aafia i se faalavelave i le aoauli o le Aso Sa na tea nei ua ta’ua ai sa eli e tamaiti e toalua 12 ma le 14 tausaga se ana i totonu o se faaputuga oneone i luga o Melands Beach i Great Barrier Island ae solo ane ai le uta oneone i luga o le toalua lea.
O le ogatotonu o le vaiaso sa faailoa ai i se faamatalaga mai le tamā o se tasi o tamaititi ma faamaonia ai o lona atalii ua aveese le masini faaola a le falemai sa faamānava ai ma faamaonia mai ai loa e leoleo i le taeao analeila le maliu o sia tamaititi.
I lea faamatalaga tusitusia mai le tamā lea ua talosagaina ai tagata ia tatalo mo lo latou aiga aemaise le isi tamaititi lea foi o loo tigaina i le falemai.
I se faamatalaga a le aoga a Kaitoke ua faailoa ai le mafatia o tamaiti aoga ina ua maua le tala faanoanoa ma ua tapunia le aoga i le asō ma le Aso Lua o le vaiaso fou a o feagai ai ma le faanoanoa i le tulaga ua tulai mai ua aafia ai sui o le aoga.
