O se faalavelave na tula’i mai anapo i Aukilani i Sisifo na maliu ai se tamaitai i ni manu’aga ogaoga mai se laau malosi. O lenei faalavelave na tupu i Newington Rd, i Henderson. O le lipoti a le NZHearld o loo ta’ua ai le faavave atu o leoleo i lea faaitu i le po anapo i le latalata i le 9pm anapo.
Sa taumafai le vaega o faalavelave faafuasei e lavea’i le ola o lenei tamaitai, ae sa le’i manuia taumafaiga ona o le ogaoga o ona manu’aga ma maliu ai lava i le nofoaga na tupu ai le faalavelave.
O nisi o molimau i lea faalavelave o loo ta’ua ai e se tasi o tamaitai, na latou faalogoina le leotetele o finauga a se alii ma se tamaitai, o loo misa ae latou te le’i manino lelei i upu o le la misa; mulimuli ane ae latou faalogoina le pā o se fana ma lagona foi le leo o le fafine o loo e’e ma laulauvavale.
Ta’ua foi i molimau a leoleo le vaaia o le tusa ma le fitu taavale a leoleo ua taunuu atu i le nofoaga o le faalavelave, taunuu atu foi ma le taavale a le vaega o faalavelave faafuase’i (ambulance crew).
E faatalitalia le iai o nisi lipoti atili o lenei faalavelave ae na ta’ua mai e leoleo, e lē o iai so latou talitonuga o lenei faalavelave o se mataupu e ono faaauau ai pea nisi feteena’iga.
Faaopoopoga o le lipoti:
Ua molia nei se alii 34 tausaga le matua i le maliu ai o le tamaitai anapo i le faaitu lea o Henderson i Aukilani e pei ona ta’ua i lenei lipoti i le taeao nei.
O lipoti a le One News i le asō na ta’ua ai e le alii leoleo asiasi o John Sutton e faapea, o le alii 34 tausaga le matua lea ua molia, ma na tula’i i le faamasinoga faaitumalo i Waitakere i le asō.
O loo faailoa e leoleo le faagasolo ai pea o le su’esu’ega i lenei faalavelave.
