O le asō lea e tatau ona toe taunuu mai ai i Sini le vaatele o le Carnival Splendour lea sa alu lana malaga mo le 9 aso e faataamilo i le Vasa Pasefika ma na tuuvaa ese atu ma Sini i le Aso Gafua o le vaiaso talu ai.
E iai se tala faanoanoa na lipotia mai i le faigamalaga a le vaa lea ina ua taunuu atu i Vanuatu, ua ta’ua ua maliu ai se tasi o le pasese a o faamālū i le motu e faaigoa o Mystery Island.
Faapea se faamatalaga e pei ona ta’ua i le lipoti e foliga sa iai se tulaga faaletonu i le soifua maloloina o le pasese lea a o faamālū.
Ua faailoa mai e le kamupani e pulea le Carnival Splendour o loo ofoina le lagolago i le aiga o lē ua aafia ma pasese foi i luga o le faigamalaga lea.
Ua faailoa foi o loo faatalia se faamatalaga mai le matagaluega o le va i fafo e tusa o lenei faalavelave.
