O se tala faanoanoa le oo mai ai o faamatalaga i le maliu faafuase’i ai o se tasi alii faipelē Tonga o le ‘aupaga mamafa i Niu Sila, a o taumafai atu e lavea’i mai nai ona alo e to’alua na tauau ina malelemo a o iai i se latou tafaoga i totonu o Tonga.
I faamatalaga mai le NZ Herald na ta’ua ai, na tula’i lenei faalavelave i le aso 19 o le masina talu ai o Novema.
I tulaga o lenei matāupu e faapea na iai lea alii ma si ona to’alua ma le fanau e to’atolu i le matāfaga mo tafaoga masani, ae o le taimi na aga’i ai e ‘au’au i le sami na faafuase’i ai le ta i tai e ‘ave o le sami o tamaiti e to’alua; o lea na taumafai atu ai loa le tamā e lavea’i mai i la’ua nei.
Ua faamauina i se lipoti a leoleo, na mafai ona sao mai le tasi o tamaitiiti, ae o le isi na mamao lava i tai le mea ua oo iai ma o lea na oo iai Semisi Kalu e fesoasoani i si ona atalii.
E faapea na sao uma mai uta i la’ua ae ua faate’ia i le pa’ū o Semisi, e pei ua matapogia; na taumafai e faatino gaioiga o fesoasoani muamua, CPR, pagā lea e le’i mafai ona toe te’i mai Semisi.
Faamatala e se tasi o tagatānuu Tonga e iloga foi i le taaloga o faipelega – o sē e iai sootaga i le to’alua o lē ua maliu, Paea Wolfgramm, le mata’utia tele o lenei faalavelave; ma ia ta’ua o Semisi Kalu o se tamā e alofa i lana fanau, o se tagata e galue malosi mo lona aiga.
I lipoti na faamauina ai le faalaua’itele ai o sa’afi’afiga a le to’alua o Semisi, le tinā ia Alexandria e tusa ai ma lenei alii i lo latou mafutaga.
Na toe taliu mai Niu Sila nei lea aiga i le vaiaso talu ai ma le tino maliu o Semisi Kalu ma o le aso a taeao o le a faia ai ona toe sauniga mulimuli ma lona aiga.
Puna o Faamatalaga: https://www.nzherald.co.nz/kahu/new-zealand-heavyweight-boxer-semisi-kalu-drowns-saving-sons-during-tonga-beach-holiday/
