E lei leva nei ona malaga mai si tamā e suafa ia Paul Doran ma si ona aiga i Ausetalia e amata ai le soifuaga i lenei atunuu peitai ua maua le tala faanoanoa i le vaiaso nei o si tamā sia ua maliu a o taumafai e laveai mai si ona afafine mai le sami i se matafaga i le North Coast o Niu Sa Uelese.
E 45 tausaga o sia tamā mai Aialani na malaga mai ma lona toalua ma le la fanau e toatolu ma aumau i Lennox Head peitai o le vaiaso na tea nei na tupu ai se faalavelave i le Seven Mile Beach sa iai ina ua faafuasei ona tafea ai le afafine laititi o Doran i le sami ma faavave atu loa iai si ulugalii peitai na faasaoina le teineititi ae lei toe foi ane si tamā lea ma maua ai i se taimi mulimuli ane. Sa taumafai iai galuega laveai peitai e lei manuia.
O molimau uma a si ona aiga ma uo o se tamā e fiafia e faamuamua lona aiga ma o loo iai se taumafaiga saili tupe e fesoasoani ai i te sauniga o si tamā e faia i Ausetalia nei faapea foi ma Aialani.
